Club Atlético Osasunak aliantza sinatu du Macronekin, eta, horren bidez, marka italiarra bere babesle tekniko ofiziala izango da datozen sei denboraldietarako. Lotura uztailaren 1ean hasiko da, eta 2030era arte iraungo du. Denboraldi horretan, Macron izango da klub gorritxoa joko-ekipazioetan, entrenamendu- eta bidaia-jantzietan ikusiko duen enpresa, baita lizentzia esklusiboa ere osagarri-sorta batean.

"Oso pozik gaude Macronekin lortu dugun akordioarekin, Osasunaren historian babes teknikorako kontraturik garrantzitsuena baita. Eskerrak eman nahi dizkiot Macroni aliantza hau ezartzeko erakutsi duen interes handiagatik, eta baita gure langileen lanagatik ere. Izan ere, oso akordio ona lortu dute klub gisa hazten jarraitu ahal izateko. Gainera, ziur nago zaleak pozik egongo direla Osasunak ekipamendu esklusibo eta pertsonalizatuak izan ditzakeelako", azaldu du Luis Sabalza elkarteko presidenteak.

"Pozik nago Macronen familiari ongietorria ematearekin, historian aberatsa eta xarmagarria den Osasuna bezalako klub batera, non pasioa eta pertenentzia-zentzua hautaketa bakoitzaren motorra diren. Osasuna eta Nafarroa estimuluz beteta daude talde baten espiritua eta harrotasuna ez ezik, herri oso batena ere adieraz dezaketen bilduma paregabeak sortzeko ", dio Gianluca Pavanello Macronen CEOak.

Macronek gizonezkoen lehen taldearen, Promesen, nesken egituraren, Fundazioaren futbol eskolen eta Eskola arteko Txapelketako taldeen janzkeren hornikuntza emango du. Osasunak bere joko-ekipamenduen diseinu pertsonalizatua izango du, maila estetikoan aukera berriak ezarriz.

Akordioa datozen sei denboraldietarako aurreikusita dagoen arren, klubak kontratu harremanean denboraldi bateko luzapen automatikoa sartu du gizonezkoen lehen taldeak LaLiga EA Sports baino maila baxuagoan jokatzen duen ikasturte bakoitzeko, zortzi kanpainako gehieneko lotura lortu arte.

Marconek egingo du dendaren kudeaketa

Akordioaren beste berritasun garrantzitsu bat da Macron izango dela Osasuna Klub Atletikoaren denda ofizialaren kudeatzailea, azken denboraldietan lan horretaz arduratu zen enpresarekin (Smarketing) kontratu-harremana amaitu ondoren. Italiako enpresak kudeatuko ditu denda fisikoa eta online denda.
Sadarren dagoen espazioa bikoiztu egingo da datorren denboraldirako. Osasunaren jantziez gain (gizonezkoena eta emakumezkoena), Macronek "teamwear" eta "individuals" bildumetako produktuak salduko ditu.

Erreferentziako kirol-marka bat

Macron erreferentziazko marka da kirol-arroparen sektorean. Egoitza nagusia Crespellanon du, Bolonia kanpoaldean dagoen udalerrian, 1971n marka sortu zuten hirian. Gaur egun, Macronek Bolonia, Sampdoria, Udinese, Brujas, Reala, Cadiz, Crystal Palace, Basilea, Hannover 96, Estrella Roja edo Nantes bezalako taldeak janzten ditu, baita Suitzako eta Albaniako selekzioak ere. UEFAko epailen hornitzaile ofiziala ere bada. Era berean, beste kirol batzuetako taldeak, hala nola Gales, Eskozia eta Italiako selekzioak Errugbiko Sei Nazioetan edo Boloniako Virtusa saskibaloiko Euroligan.